गोंडवाना विद्यापीठात संविधान दिनानिमित्त व्याख्यानाचा कार्यक्रम. संविधानाची मूल्ये आचरणात आणणे आणि ती कृतीत उतरविणे आवश्यक; डॉ. पुरणचंद्र मेश्राम

गडचिरोली, (गो. वि.) दि.२६ नोव्हेंबर २०२५ भारतीय संविधानातील मूल्ये म्हणजे राष्ट्राच्या जडणघडणीत मार्गदर्शक ठरणारे मूलभूत तत्त्वे आहे. संविधानाच्या प्रस्तावनेत आणि विविध भागांत ही मूल्ये स्पष्टपणे प्रतिबिंबित होतात. आज अनेक ठिकाणी संविधान दिन साजरा होत आहे. पण विद्यापीठात संविधान दिन साजरा होणं म्हणजे विद्यार्थ्यांसाठी ही मोठी बाब आहे कारण विद्यापीठ कायद्यात संविधानाच्या मूल्यांचे सवर्धन करणं याचा समावेश आहे. त्यामुळे अशा कार्यक्रमाच्या आयोजनातून विद्यार्थ्यांमध्ये संविधानाची मूल्ये रुजविली जातात. त्यामुळे संविधानाची मूल्ये आचरणात आणणे आणि ती कृतीत उतरविणे आवश्यक आहे. असे प्रतिपादन राष्ट्रसंत तुकडोजी महाराज नागपूर विद्यापीठाचे माजी कुलसचिव डॉ. पुरणचंद्र मेश्राम यांनी केले. भारतीय संविधानास दिनांक 26 नोव्हेंबर 2025 रोजी 76 वर्षे पूर्ण होत आहेत. याचे औचित्य साधून, गोंडवाना विद्यापीठातील डॉ. बाबासाहेब आंबेडकर अध्यासन केंद्राच्यावतीने विद्यापीठात "भारतीय संविधान: राष्ट्र उभारणीचा पाया" या विषयावर विद्यापीठातील नवीन सभागृहात व्याख्यानाचे आयोजन करण्यात आले. या प्रसंगी ते बोलत होते . यावेळी कार्यक्रमाच्या अध्यक्षस्थानी कुलगुरु डॉ. प्रशान्त बोकारे ,प्रमुख उपस्थिती म्हणून विद्यापीठाचे प्र-कुलगुरु डॉ. श्रीराम कावळे, कुलसचिव डॉ. अनिल हिरेखण, व्यवस्थापन परिषदेचे सदस्य प्रशांत मोहिते, डॉ. बाबासाहेब आंबेडकर अध्यासन केंद्राचे प्रमुख डॉ. दिलीप बारसागडे यांची प्रमुख उपस्थिती होती. कार्यक्रमाच्या सुरवातीला डॉ. बाबासाहेब आंबेडकर यांच्या प्रतिमेला मान्यवरांच्या हस्ते माल्यार्पण आणि अभिवादन करण्यात आले. त्यानंतर कुलगुरू डॉ. प्रशांत बोकारे नेतृत्वात भारतीय संविधान प्रास्ताविकेचे सर्वानी वाचन केले. अध्यक्षस्थानावरून बोलताना कुलगुरु डॉ. प्रशान्त बोकारे यांनी संविधान हे आपल्या कृतीत उतरविण्याचा भाग आहे. आपण संविधान आपल्या आयुष्यात किती आणल याचा लेखाजोखा आपण पुढच्या संविधान दिनी मांडू असे ते म्हणाले. सविधान गीत गोंडवाना विद्यापीठाच्या आस्थापना विभागाचे लघुलेखक प्रशांत पुनवटकर यांनी सादर केले. वक्त्याचा परिचय जनसंवाद विभागाची विद्यार्थ्यांनी पल्लवी फुकट यांनी करून दिला. प्रस्ताविक डॉ. बाबासाहेब आंबेडकर अध्यासन केंद्राचे प्रमुख डॉ. दिलीप बारसागडे, संचालन मराठी विभागाचे सहा . प्रा . निळकंठ नरवाडे यांनी केले. तर आभार गोंडवाना विद्यापीठाचे कुलसचिव डॉ. अनिल हिरेखण यांनी मानले.कार्यक्रमाच्या यशस्वीतेसाठी डॉ. बाबासाहेब आंबेडकर अध्यासन केंद्राचे सहसमन्वयक रोहित कांबळे यांनी परिश्रम घेतले . कार्यक्रमाला विद्यार्थी तसेच शिक्षक आणि शिक्षकेतर कर्मचाऱ्यांची मोठ्या संख्येने उपस्थिती होती.