ॲग्रोव्हिजन २०२५ मध्ये ट्रायसेफ नवसंशोधन केंद्रातील नवउद्योजकांचा उत्स्फूर्त सहभाग, नवीन संधी, नाविन्यपूर्ण उत्पादने आणि ग्रामीण उद्योजकतेला चालना

गडचिरोली (गो. वि.)दि. मध्य भारतातील सर्वात मोठी कृषी प्रदर्शनी ॲग्रोव्हिजन २०२५ चे आयोजन दिनांक २१ ते २४ नोव्हेंबर २०२५ दरम्यान नागपूर येथे करण्यात आले. या महत्वपूर्ण कार्यक्रमात गोंडवाना विद्यापीठाच्या ट्रायसेफ नवसंशोधन केंद्रातील १३ नवउद्योजकांनी उत्साहपूर्ण सहभाग नोंदविला. ॲग्रोव्हिजन २०२५ प्रदर्शनीमध्ये गडचिरोली व चंद्रपूर जिल्ह्यातील पर्यटन व कृषी पर्यटन प्रकल्प, वनउपज आधारीत प्रक्रिया उत्पादने, आदिवासी हस्तकला, तसेच शेत फवारणीसाठीच्या आधुनिक ड्रोन तंत्रज्ञानाची आकर्षक प्रदर्शनी लावण्यात आली होती. ग्रामीण भागातील नाविन्यपूर्ण कल्पना आणि उत्पादने एका मोठ्या व्यासपीठावर आणण्याची महत्वपूर्ण भूमिका ट्रायसेफने निभावली. ट्रायसेफ नवसंशोधन केंद्राचे संचालक प्रा. मनिष उत्तरवार, मुख्य कार्यकारी अधिकारी वृषांक सोरते, व्यवस्थापक रिया हिंडोचा, आणि प्रशासकीय सहाय्यक पंकज गहाणे यांनी संपूर्ण प्रदर्शनी दरम्यान नवउद्योजकांना मार्गदर्शन व आवश्यक सहाय्य उपलब्ध करून दिले. ॲग्रोव्हिजन २०२५ दरम्यान अनेक मान्यवरांनी ट्रायसेफच्या स्टॉलला भेट देत नवउद्योजकांची प्रशंसा केली.. आमदार सुधीर मुनगंटीवार तसेच माजी आमदार डॉ. नामदेव उसेंडी, गोंडवाना विद्यापीठाचे कुलगुरू डॉ. प्रशांत बोकारे, राष्ट्रसंत तुकडोजी महाराज नागपूर विद्यापीठाच्या कुलगुरू डॉ. माधवी खोडे चवरे, यांनी स्टॉलला भेट देऊन नवउद्योजकांना प्रेरणादायी मार्गदर्शन केले आणि त्यांच्या उपक्रमांची माहिती जाणून घेतली. प्रदर्शनीमध्ये ट्रायसेफद्वारे सादर करण्यात आलेल्या उत्पादनांना उपस्थित शेतकरी, विद्यार्थी, गुंतवणूकदार आणि विविध संस्थांच्या प्रतिनिधींकडून उत्तम प्रतिसाद मिळाला. अनेक नवउद्योजकांना व्यावसायिक संपर्क, सहकार्याच्या संधी, तसेच भविष्यातील बाजारपेठ विस्तारासाठी महत्त्वपूर्ण मार्गदर्शन मिळाले. ॲग्रोव्हिजन २०२५ मधील सहभागामुळे गडचिरोली व चंद्रपूर जिल्ह्यातील तरुण उद्योजकांना मोठ्या बाजारपेठेशी जोडण्याची संधी उपलब्ध झाली असून, ट्रायसेफचे हे प्रयत्न ग्रामीण भागातील नाविन्यपूर्ण उद्योजकतेला नवी गती देणारे ठरत आहेत.